НИИ национального образования УР

     2019 арын Институтлэн кутэм планэзъя 10-11 классъёслы удмурт кылъя учебниклэн линиез (удмурт кылэз тодӥсь пиналъёслы) пумозяз вуттэмын.
    Кыӵе аспӧртэмлыкез та учебниклэн?
    Учебник кылдытэмын, шор ёзо дышетонлэн федерал кун стандартэз вылэ пыкиськыса. Вань дышетон материал удмурт текстъёс вылын сётэмын. Текст бордын ужан дышетскисьёсты котыр ласянь азинтэ, шонер гожъяськыны, пӧртэм вераськон югдуръёсы чебер вераськыны дышетэ. Учебнике текстъёсты вошъян-тупатъян ужъёс пыртэмын. Та ужъёс озьы ик нылпиослэсь шара вераськон кылзэс но сочинениос гожъяны быгатонлыкъёссэс азинтыны юрттозы.
    Учебниклэн пуштросаз бадӟым саклык висъямын творческой ужъёслы (кылсярысь, ивортодэтэз утчан, сое сэрттон-пертчон, соя кенешон но мукет). Учебник узыр визьнодась, малпаськытӥсь текстъёсын. Соосты лыдӟыса, дышетскисьёс ас мылкыдынызы люкисько, дунъетсэс сёто, яке верамез/гожтэмез азьланьто.
    Туала вакытэ школаын нылпиосты проектъёс гожъяны дышетон одно быдэстоно уж луэ. Соин учебниклэн пуштросаз проектъёс гожъяны чакламын, кылсярысь, удмуртъёс сярысь вашкала гожтэмъёсты эскеронъя, газетэ статья дасянъя проектъёс.
    Вераны кулэ, учебниклэн путросэз дышетскисьёслэсь азьло аръёсы басьтэм тодон-быгатонлыкъёссэс текст но вераськон пыр огазея но азинтэ.